عام انتخابات: ملک بھر کے مختلف حلقوں میں پولنگ شروع نہ ہو سکی


 لاہور:  ملک بھر میں عام انتخابات کیلئے پولنگ کا وقت شروع ہونے کے باوجود مختلف حلقوں میں پولنگ شروع نہ ہوسکی۔

رپورٹس کے مطابق قومی اسمبلی کے حلقہ این اے 48 شہزاد ٹاؤن کے پولنگ سٹیشن پر پولنگ کے آغاز میں تاخیر ہوگئی ہے، شہزاد ٹاؤن کے پولنگ سٹیشن کے باہر ووٹرز بڑی تعداد میں موجود ہیں تاہم عملہ پولنگ کے انتظامات میں مصروف ہے۔

کراچی سے قومی اسمبلی کے حلقے این اے 250 کے پولنگ سٹیشن نمبر 262 سے 265 پر بھی پولنگ شروع نہ ہوسکی، پولنگ سٹیشنوں پر پریزائیڈنگ افسران کے نہ پہنچنے کے باعث پولنگ شروع نہیں ہو سکی ہے، پولنگ سٹیشنز کے باہر ووٹرز کی لمبی قطاریں لگ گئی ہیں۔

رپورٹس کے مطابق کراچی کے حلقے این اے 246 اورنگی ٹاؤن کے پولنگ سٹیشن نمبر 77 میں بھی پولنگ شروع نہ ہوسکی، اورنگی ٹاؤن سپر گرامر سکول کے پولنگ سٹیشن نمبر 77 میں نہ عملہ پہنچ سکا اور نہ ہی سامان پہنچ پایا ہے، پولنگ سٹیشن پر سکیورٹی اہلکار اور امیدواروں کے پولنگ ایجنٹ پہنچ گئے ہیں۔

کراچی کے حلقہ این اے 246 کے غوثیہ کالونی سٹیشن نمبر 280 اور 281 میں پولنگ کا عمل تاحال شروع نہیں ہوسکا، پولنگ بوتھ کا سامان 8 بجے کے بعد پولنگ سٹیشن پہنچا، پولنگ سٹیشن میں چودہ سو سے زائد مرد اور 1192 خواتین کے ووٹ رجسٹرڈ ہیں۔

پولنگ عملے کا کہنا ہے کہ موبائل فونز نیٹ ورک متاثر ہونے سے رابطوں میں مسائل کا سامنا ہے۔

دوسری جانب پشاور کے میونسپل انٹرکالج پولنگ سٹیشن نمبر83 میں خواتین کے پولنگ سٹیشن پر پولنگ کا عمل شروع نہ ہوسکا، خواتین ووٹرز کی بڑی تعداد پولنگ سٹیشن کے باہر موجود ہے، پولنگ ایجنٹ کے نہ پہنچنے کی وجہ سے پولنگ کا عمل شروع نہ کیا جاسکا۔

ادھر پشاور میں گلبہار گورنمنٹ گرلز کالج میں بھی پولنگ کا آغاز نہ ہوسکا۔

اسسٹنٹ پریزائیڈنگ آفیسر کا کہنا ہے کہ پولنگ عملہ رابطے میں ہے جلد پہنچ جائے گا، زیادہ تر سٹاف آچکا ہے جلد پولنگ کا عمل شروع کر دیا جائے گا۔

خیبرپختونخوا کے علاقے بونیر میں سرد موسم کے باعث مختلف پولنگ سٹیشنوں پر بھی پولنگ تاخیر کا شکار ہوگئی ہے، بونیر کی پولنگ سٹیشن نمبر 109 گرلز ڈگری کالج ڈگر میں پولنگ ایجنٹ اور ووٹرز ہی نہیں پہنچ سکے۔

واضح رہے کہ عام انتخابات 2024 کیلئے پولنگ کا عمل صبح 8 بجے سے شروع ہوگیا ہے جو بغیر رکاوٹ شام 5 بجے تک جاری رہے گا، ملک بھر میں ووٹر قومی اور صوبائی اسمبلی کے حلقوں پر اپنے پسندیدہ امیدواروں کو ووٹ کاسٹ کر سکیں گے۔

0/Post a Comment/Comments