سابق سری لنکن بولر سچیتھرا سینانائیکے میچ فکسنگ کے الزام میں گرفتار

کولمبو:  سابق سری لنکن آف سپنر سچیتھرا سینانائیکے کو میچ فکسنگ کے الزام میں گرفتار کرلیا گیا۔

غیر ملکی میڈیا رپورٹ کے مطابق سینانائیکے خود اُس وقت لنکا پریمیئر لیگ کا حصہ نہیں تھے،ان پر الزام ہے کہ انہوں نے ایل پی ایل میں حصہ لینے والے ایک سے زیادہ کھلاڑیوں سے میچ فکسنگ کے لیے رابطہ کیا۔

بعد ازاں یہ معلومات مبینہ طور پر ٹورنامنٹ کے اینٹی کرپشن یونٹ کے افسران تک پہنچائی گئیں اور پھر کرکٹر کے خلاف کارروائی شروع کی گئی۔

میڈیا رپورٹ کےمطابق الزامات کی تحقیقات شروع ہونے کے بعد گزشتہ ماہ عدالت نے سینانائیکے پر سفری پابندی بھی عائد کر دی تھی، تاہم بدھ کو سری لنکن پولیس نے سابق آف اسپنر کو گرفتار کرلیا۔

سری لنکن پولیس کے مطابق سینانائیکے کو 24 گھنٹوں میں عدالت میں پیش کیا جائے گا، 38 سالہ سینانائیکے نے سری لنکا کی جانب سے ایک ٹیسٹ، 49 ون ڈے اور 24 ٹی ٹوئنٹی میچز کھیلے۔