ایشیاکپ: سری لنکن ٹیم کے 2 کرکٹرز کا کوویڈ ٹیسٹ مثبت آگیا
کولمبو: ایشیا کپ کے آغاز سے قبل دفاعی چیمپئن سری لنکا کی ٹیم میں 2 کرکٹرز کا کوویڈ ٹیسٹ مثبت آگیا۔
رپورٹ کے مطابق سری لنکن کرکٹ ٹیم کو ایشیا کپ کے آغاز سے صرف 5 روز قبل بڑا دھچکا لگا ہے، لنکن ٹائیگرز کے دو اہم بلے باز کوشل پریرا اور اویشکا فرنینڈو کا کوویڈ 19 کا ٹیسٹ مثبت آیا ہے۔
حال ہی میں ختم ہوئی لنکن پریمئر لیگ (ایل پی ایل) میں فاسٹ باؤلر دوشامنتھا چمیرا کندھے کی انجری کا شکار ہو گئے تھے جس کے باعث ٹورنامنٹ سے باہر ہونے کا امکان ہے جبکہ لیگ سپنر وانندو ہسرنگا کم از کم 2 میچز سے محروم رہ سکتے ہیں۔
سری لنکن ٹیم ایشیا کپ میں اپنی مہم کا آغاز 31 اگست کو پالے کیلے میں بنگلہ دیش کے خلاف میچ سے کرے گی جبکہ اپنا دوسرا گروپ میچ 5 ستمبر کو لاہور کے قذافی سٹیڈیم میں کھیلے گی۔
واضح رہے کہ ایشیا کپ کا آغاز 30 اگست سے ہو گا، جس میں پاکستان اور نیپال کی ٹیمیں ملتان کرکٹ سٹیڈیم میں مدمقابل آئیں گی۔
ایک تبصرہ شائع کریں