اگلے 15 سے 20 روز میں پاکستان میں روسی تیل دستیاب ہوگا: مصدق ملک
وزیرِ مملکت برائے پٹرولیم مصدق ملک نے کہا ہے کہ اگلے 15 سے 20 روز میں پاکستان میں روسی تیل ہوگا۔
نجی ٹی وی کے پروگرام میں خصوصی گفتگو کرتے ہوئے مصدق ملک کا کہنا تھا کہ سیاسی جماعتوں کے درمیان تنازعات کو تھمنا ہوگا، رکنا ہوگا، ایسے تو کریانہ کی دکان نہیں چلتی، آپ ملک کیسے چلا سکتے ہیں؟
انہوں نے کہا کہ گیس پر 1700 ارب روپے کا گردشی قرضہ تھا، ہم نے اس گردشی قرضے کو صفر کر دیا، ایل این جی پر بھی گردشی قرضے کو صفر کر دیں گے، تاریخ میں پہلی بار 2 روسی وزیر 86 رکنی وفد کے ہمراہ پاکستان آئے، روس سے رعایتی قیمت پر تیل مل رہا ہے۔
وزیر مملکت کا کہنا تھا کہ حکومت کی جانب سے اہم فیصلے کئے جا رہے ہیں، حالات کو بہتر کرنے کیلئے مشکل فیصلے کئے جا رہے ہیں، آگے بڑھنے کیلئے ہمیں چھوٹے کاروبار کرنے والوں کو پروموٹ کرنا ہے، بجٹ میں چھوٹے کاروبار کرنے والوں کو سہولتیں دینے پر غور کر رہے ہیں، ہم نے تاپی گیس منصوبے سے سستی گیس لانی ہے، اس پر تیزی سے کام کر رہے ہیں۔
انہوں نے کہا کہ آٹو موٹو پالیسی کو بنائے کئی سال ہو چکے، آج تک ہم ایک انڈیکیٹر کا کور نہیں ایکسپورٹ کر سکے، میرے خیال میں ہماری آٹو موٹو پالیسی بہتر نہیں۔
وزیرِ مملکت برائے پٹرولیم کا کہنا ہے کہ عمران خان نے 190 ملین پاؤنڈز سپریم کورٹ کے اکاؤنٹ میں ڈلوا دیئے، یہ 190 ملین پاؤنڈز پاکستان کے اکاؤنٹ میں آنے تھے، آئین سے ماورا اور قانون سے بالا تر کچھ نہیں ہونا چاہیے، 9 مئی کی ویڈیو کے ذریعے لوگوں کو شناخت کر کے پکڑا جا رہا ہے، نادرا سے تصدیق کے بعد لوگوں کو گرفتار کیا جا رہا ہے۔
ایک تبصرہ شائع کریں